Anpil moun dakò ke iPhone yo pami pi bon telefòn ki genyen yo, men akoz de pri yo, anpil moun konn achte yo dezyèm men aprè yon fanmi oswa yon zanmi achte modèl ki pi resan yo, sitou si gen yon pri spesyal atravè konpayi kominikasyon yo.
Men, telefòn entèlijan sa yo pa sèvi sèlman pou fè apèl ak voye SMS, yo kapap genyen kòd aksè divès kalite aplikayon tankou rezo sosyal, email, divètisman ak aplikasyon bankè. Pou fè si ke tout enfòmasyon sa yo rete prive, premye proprietè aparèy la sipoze efase tout enfòmasyon l ak fichye ke l genyen sou li.
1. Premye etap la se fè yon bakòp oswa yon kopi tout sa w genyen sou aparèy la.
Si w poko konnen kòman pou fè bakò yon iPhone, mwen konseye w li atik sa ki rele Twa fason pou fè bakòp yon iPhone.
Si w pa bezwen anyen nan sa ki nan telefon nan oswa w gentan gen yon bakòp deja, pase dirèkteman nan dezyèm etap la.
2. Dezyèm etap la se retire ID w sou telefòn nan
Pou retire ID a sou telephone nan ou prale nan :
- Reglaj
- klike sou non w nan premye opsyon ki nan lis la
- klike sou dekonekte anba dezyèm lis opsyon an
- Tape modpas ou itilize pou ID a epi peze bouton Etèn ki anlè e adwat la.
- W’ap gen yon dènye chans pou kenbe kèk fichye ke w genyen sou aparèy la, seleksyone sa w vle kenbe yo epi klike sou dekonekte
Sistèm nan ap pran yon ti tan pou sovgad sou aparèy la, epi l’ap mande w yon dènye fwa si w vle tout bon vre retire fichye w yo ak ID w la sou telefòn nan. Pou w kontinye, w’ap klike sou dekonekte
Aprè yon ti tan, ou sipoze wè yon fenèt tankou egzanmp sa
3. Twazyèm etap la se efase done iPhone nan
Pou efase iPhone nan ou prale nan :
- Reglaj
- Jeneral
- anba lis la peze transfere oswa reinisyalize iPhone
- peze efase tout kontni ak reglaj yo
- sistèm nan ap montre w kantite done ke w genyen sou telfòn nan pou si w ta vle chanje lide w. Klike sou Kontinye pou w kontinye ak pwosesis la
- Nan pwochen fenèt la, tape kòd aksè w la epi peze Efase iPhone sou bouton ki parèt la.
Aprè telefòn nan redemare plizyè fwa li sipoze afiche yon ekran tankou nan egzanp sa:
Kounya ou ka vann oswa fè kado iPhone sa san danje.
